15.8.10

ومالبعبوص...الحمدولله

تنهدت العمّة ضرّوتانة ومهمهت:

ملاّ بلادي و ملاّ احنا و ملاّ ناس عايشين...برّة كيما نشوف عندك وليدي..

"تبسم سنكوح و كشبر فرد وقت...ما نجّمش يتحكم في ملامح وجهو المرّة هاذي...هو ما ستوعبش علاش و كيفاش ملامح الفاطشاطة متاعو خرجو على سيطرتو و ما نجّمش يسطّّر ضحكة موهمة كيما مستانس يعمل في الكوشة للعباد اللي تتلمّس الخبز كيما يتلمسو مسلان العلّوش في البتوار..."

سنكوح:

-الكلّو من وزارة الثقافة يا ميمة...الكلّو منهم...حطمو العباد بالبيروخراطية و إ جراءات القحب و الدروشة متاعهم...ماهمش الكلّ كيف كيف...حاشى بعض الأخيّان و ربّي يصلح في رايهم على قريب...فيهم الباهي, أما كيف ما تعرف الباهي تُحكم عليه البهاوة متاعو باش يبلّجّ و يجتنب أي إشتباك حتّى و إن كان فكري مع زملاؤو الفاتقين الناطقين المبعبصين المرضى النفسانيين اللي ممرضين معاهم شلّة مثقفين ,مخرجين ,ممثلين,فنانين,معلمية و أساتذة مسرح...ناس تتنفس ركح...تتكلّم شعر....تشوف حرَكة...و تسمع صوت الستار كي يهبط...ناس تموت و تحيا فنّ و ناس جايبينها من طْيِس عفن...الكلّو ماك الوزارة ياميمة...خلّيك ما تدريش خير...إحلم يا ميمة و سمّع الجيران التنهيدة...حتى همّا راهي قلوبهم تبشمطت قدّام التلفزة المقعمزة...و إيترات الشربة بدات تغوثلهم في قعر المعيدة..

ضروتانة:

وليدي أنا هذا كلامك مي يخشش دماغي و ما نطيقاش...أما على وخاتر السنا عامكم و ملزوم علينا نلهاو بيكم هاني باش نمِد هالوذن و نصغيلك...السنا عام لحْوار,عام إشباب...و رد بالك لا تلم كرعيك...إستغل شبابك راهو ما شاخو فاها كان هوما إسنة...مالا واشنهي قتلي؟

سنكوح:

- وزارة السقافة هي اللي عاونت في مرض الشعب واللي وصلو خذاو منها الأوكي كملو علاها المشروع...

توّة من رمضان لرمضان و علّة التونسي النفسوية لقدّام ليس التالي...اللي بعقلو يولي بوهالي... والبوهالي هو اللي بايعها بلفتة.. كل مرّة طالعينلهم بصعدة...كلّ رمضان يزيدو لميزانهم 7 كيلو كبت...مسلسلاتنا اخطر من "بو غريب" و "كوانسا.نمّو"...يبثّولهم في السم في الدم...يخدرو فيهم و قلش عليهم مستحقين مخدرات...مركز شرطة قمّة في الجنتيياس بوليسية تضرب باها المثل في البوليتاس...كلامهم أُرطب أرطب أرطب..تي راهو بالعمال تكثّر من سمعانو تزلق مالرطابة...واللبسة والهندام والجاني يتمشا في بهو المركز راسو مرفوع والقدّام وجهو نظيف, لا مخبّش لا مدبّش...تلهاو بيه في الطريق و هوما يوصلو فيه...نظفولو و فوحولو و حكاو معاه و حسسوه إللي هو إقترف خطاأ و لازمو يخلص لا أكثر لا أقل...يهبطوه مالكرهبة حاسس إللي هو إنسان يتميّز عالحيوان...إللي هو في بلد ديمخراطي...إللي هو مواطن و مهما صار عندو حقوق ينعم بيها...و المركز مانظف بيروواتو و محلا ريحتو...الريحة اللي فيه خرجت من اجناب التلفزة, فلتت مع الصوت... و يقولول تفضل..." تشرُب حاجا؟...لا والله ما تشرب حاجة...أحنا هنا ساهرين و حارصين على تحسيسك إنّك في أمن و امان ... إنتي مشكور...تي كان موش لعباد اللي كيفك رانا بطّالة و نسعسقو بالألفاروميو..مكرزين...ناكلو مالرستورونات بلاش...ناخذو مالقهاوي بلاش...و نسلبو في اذاكة شينكا...و نعورو هاذوكم في دبيبيزاتهم...هذا أقل ما نجمو نعملو معاكم...نسهرو على تحقيق الأمن باش سيادتك تعيش هاني سيدي...كان موش مالعباد اللي كيفك راهي كروشنا دازّة مالتخمة ووجوهنا مسودة مالرشوه...و سعودنا مكبوبة من دعاء عرق فلان و عرق فلتان.."

قداشو جونتي المركز في المسلسل التونسي...ناقصو كونتوار و مكينة يشرّه..يشرّه يشرّه ...تشتهى تشرب فيه قهوة الصباح...

ضرّوتانة:- يا وليدي باش تبيتني في قلبو عقاب عمري ؟ دوّر علينا المستوج واحكي في حاجة أخرى...

سنكوح: ماتخافش يامّة..أنا قاعد ننقد في العمل التلفزي لا بلوس لا موان...و كانك عالطيوح...ما تخافيش عليّة...يا حسرة كي كان فمّة حبس والعباد تخاف منّو و توهق و ماللي تكون باش تستجرم ترجعها التالي و ما تخيّرش نومة 17 فوق بعضهم على نومة فرش الدار...17 راقدين فوق بعضهم, والقمل, و ريحة الشياط,و الدخان,والحكّة,والقطوسة اللي مطيحينلها سنّيها,و العادة العلنية على المسكينة اللي في نشرة الأخبار..والظلمة والوسخ والكرب والهم والعفن وعباد مظلومة وعباد مكسرينلها ظلوعها...و عباد مستفعلين فيهم...و شباب محطمينو مقرعينلو و مكسرينلو سنّيه و ضاربينو في إيديه بش كي يخرج و ما يتبدلش نمط حياتو يلقى روحو منبوذ...و يدور يدور و يرجع للحبس و ما يقبلو كان الحبس...و ناس تعدي دهر و مبعد يعفيو عليهم بتعلّة رأفة و محبّة سيدنا الحكيم المجانية والتي تكثر و تظر كان في أيّام يقولو عليهم مباركة... و يعدّيو ايّامات و كان طارت شهر بحذة أمّاليهم و يشوفو اوضاع البلاد كيفاش ولاّت و يتضربو في سياستو الحكيمة و ما يكملوش الشهر و يجيفو و هز ربّي متاعو...ياااااااااااحسرة ياميمة عالحبس أذاكة...أُأأأأو حتى إنت واش تخرفي...تنهدي تنهدي خنكمّل لحديث..

-ضروتانة:

- إإإإإإإإإإإإييييييه نشالله تولي تقدرك لعباد على تفكيرك و موش خديمتك يا وليدي....يا رب بدّل عقلية ذرارينا..و حافظ على حكمة سيدنا..

-سنكوح:

الحبس اليوم كيما تشوفيفيه قدّامك في المسلسل

"<سنكوح يكذب على أمّو يهنّي فاها...خاتر أمّو ما تتحركش مالفرش و ما تعرف البلاد كان في التلفزة>"

..كلّ واحد ببيتو..فرشو...مكتبتو و اقلامو...و شبيبك صغيّر يطل بيه على ساحة السجن و اللي سلكها يجي في البيت اللي تحلّ عالشارع...ياخي تتفرجي في حاجة و تغمضي عين على حاجة أُخرى...ما شفتيش الحبس حليلتا خير من بيتي؟...ما شفتيش النظام وسط الحبس و ما شفتيش اللي كلّ واحد بمنشفتوو كل واحد بالبيجاما متاعو...و اكا التواليت محلاها... تعشّق...تعشّق تعشّق... أنظف من تواليت السبيطارات و الجوامع...تي شبيييييك الحبسسسْ...شكون يوصل يمشيلو ولاّ يدخلّو ...ناس تتمنّى تدخل للحبس...تي لعباد اللي فيه أنظف و اليق مالوجوه اللي تشوفها كل يوم في الشارع...شبيك راهو بالكاستينغ الدخول للحبس...موش اللي يجي...في باللك حكّ راسك إسرق جارك...إدغر ولد حومتك أُدخل للحبس؟ ...الدويو...الحبس ما يدخلّو كان اللي يسرق فلوكة كبيرة...ولاّ يغتصب ممثلة مكتوب عليها باش تسهر في المرسى...الحبس راهو يدخلّو كان اللي يسرق أرض...و يسكّر بحر مش حومة...اللهم إجعلنا من عبادك المقربين وارمي بنا في الحبس...

و محلا السبيطار...و محلاها المافيا في تونس..تذوب في الفمّ...تشجع البنات باش ينزلو عالبطاطة...والولاد يتاجرو بالشكلاطة... و محلاهم الممثلات و قداشهم بيض..دليل عالنظافة...و قداش عندهم شهايد و قداش معروفين و المشاهدين موالفبن بيهم...وقداش عندهم كريارات...أهم حاجة الكرّ...يار...عندك كرّ تمثل ماعندكش بلاصتك تتفرج ما تمفلش...مش اللي يجي يمفّل...التمفيل لمّاليه و التمثيل عندو أماليه...أعمل كريار...إطلي وجهك مليح...و خلي سروالك يطيح... و رطّب شعرك و ما تقولش جامي لا...كلمة لا.. تجيب البلى في دومان التمفيل...عجبك ما عجبكش برّة شوف وين تمفّل...وزارة الفقافة موصيتنا... الوجوه تضوي...لعباد عايشة في نعيم...كل مواطن عندو فيلا...الكل يسهر...الكل يرفرف و يحلق من الفرحة...الكلّ زاهي...الكلّ في الأعمال الخيرية لاهي...البوليس ياسر باهي...و المجرم فوق راسو تاج...و شباب واعي ماعادش يقعد في القهاوي...ولاّ يسرق و يبيع في الموتورات...والبنات ولاّت هيّة اللي تبّع في الشهوات و الذكر عايش على شويّة احاسيس و عواطف من غيرهم يضيع بازقة و يخونو عِرفو و يعمل في روحو اللهم عافينا بعض الحاجات...وزارة الفقافة تحب اكاكة...ما فمّاش كيران صفر و روايح ضبابط و ضبطان سراول, ما فمّاش "هات بطق تعريف"...الكلّو عايش في الخفيف...لا فمّة لا ظالم لا مظلوم..في بلادنا الحنش يروم...في الأمن و الأمان نربّي الحيوان...وزارة الفقافة تقول أكّاكة...

-ضرّوتانة:

- باللهي حق؟

-سنكوح:

- والله...كيما نحدّث فيك.. الوزارة قتلك هذاكة اللي يلزم خاتر إنتاجنا يتجاوز السوق المحليّة و يتداولو و ينكبّو عليه الأجانب أكثر منّا أحنا...

لبنانيين,سورييين,مصاروة و أتراك و حتّي هوليوود بدت ترمي علينا في كحل...و نظرًا لذلك فإنّ العمل أو الإنتاج التلفزي اللي يصور الواقع و يعكسو كيما يلزم أحنا نتلهاو بمولاه كيما يلزم...أحنا شعب متقدم متطور يدحظ كل مظاهر التخلف و يقاومها و يحاربها..احنا شعب و بلد ناقص دزّة باش نخرجو مالتخلف و لازمنا نتباهاو بذللك في التلفزة لازمنا نوريو ذلك حتّى قبل وقتو...إمّالا هو على سواد عينينا يقولولنا سبّاقون...في البلدان الغربية اللي على قريب باش نولّيو كيفهم, الطبيب النساوي يخدم أكثرمالشواطن و يظهر في كلّ شاشة و برنامج..واحنا مشروعنا التبع و راكم لاحظتوها أعزّائي المشاهدين...و احنا بها المسلسلات المختارة المفروزة ما بين ألوفات المسلسلات الأخرى باش نعاونو الطبيب النفساوي يخدم على روحو...كلذ ما يكتظ بيرو البسي كلذ ما يقولو علينا شعب واعي و ترك التخلف...أحنا ناس حكماء نعرفو آش نعملو...غير تفرجو...مش لازم تفهمو...مش لازم تنقدو ...مش لازم تعرفو...غلاش الفساد...ما هو كعبتين يتلهاو بالأمر هاذا يزّي فيه البركة...إنتوما عليكم كان بالفرجة...واقتباس الشخصيات أكهو...وإللّى ما يقدرش, ينجّم يحاول يكذب على روحو...التونسي متفهم و أكيد فاهمك و ما هوش بش يمنعك و لاّ يحرمك من حقّك في التفييس والكذب على روحك..يا ولدي إللي في التلفزة موش خير منّك...كيفك كيفهم...كيما هوما عايشين عيش...إحلم و موت متعنكش في أحلامك...الحلم التونسي ليك إنتي يا تونسي..خوذ الري بان ب800دينار وإنتي ترسكي في الكار...إفرح إنّك تقترب من تحقيق أحلامك...حقق حلمك ...عش الحلم التونسي...حلّ التلفزة...ريسبيري...تنفّس...إكبت...شرجي...تعلّم...و علّم...عاود تفرّج...ما تفك كان وقت اللي تحسّ روحك مؤهل للمرض...عندنا الثقة فيك...

-ضروتانة:-

اللطف اللطف يا وليدي...مررتلي الفرجة و هي ماسمحها...

بناقص يا وليدي...إنتي ما ظهرلي كان باش تنفعك برامج السنة الدولية للشباب...حليلي على وليدي خجّ...إيجا دوّر تونس سبعاء...هاو وفى المسلسل..و حرمتني منّو بحكاياتك الفارغة...

"خذا سنكوح الكوموند وحطّ تونس ضبعة...يلقى جينيريك كاستينغ..شعّل وحيّد حطب..."

سنكوح:-

-توّة عاد يا ميمتي السكات...هذاية راهو الفهري مش بعابص كبّار...هذا ولد هولاندا...وزارة الفقافة...ما عندهاش بوفوار معاه..خدمتو كلّها إبداع و جديد في جديد...و يظربولو عالطيّارة...قلّو نجوم اليل ووزارة...الفنى...الوبى و الكرّادي...واللي عندو مشكلة مع الوزارة متاع الفقافة يسكر التلفزة و يمشي يواكب المسرحيات في المسارح...و يشري الكتب متاع ولاد بلادنا...بلادنا بخير وكلّ شيء كالماء فوق الزيت...غير مخوخ العباد محدودة....و متعبهم ريتم الحياة العصرية و سوم الحليب و الزيت و الخبز والت...

ضرّوتانة:

- أيّا مش كنت تقلي أسكتي...تي ضمّ كشختك عاد...

سنكوح:

- حاضر يامّة...

"يتكّى سنكوح عالبنك ما غير ما يتنهد...وبقات التلفزة هي اللي تحسس بيناتهم.."

1 commentaires:

Anonyme a dit…

نشالله لعباد الكلّ تولّي كيف سنكوحة