30.9.11

تفرهيدة

شعب يسخف...شعب يبكي...شعب لا فلح يفسد لا فلح يتحي و يزكي
شعب مريض...شعب عقد...شعب من أول الدنيا لا قام لا قعد
شعب يهوى يعاكس و يهوى يجي ضد...تسألو علاش و لواش ما يلقى ما يرد
شعب مافهمش روحو و ماهواش فاهم روحو وماهواش باش يفهم روحو...شعب حكم على روحو بالتستيكة للأبد
شعب ستانس بالماتراك ستانس بالشرمبط ستانس بالظلم ستانس بشويان الكبد
"نهارة اللي قتلو يا شعب أخيرا راك حر...تكلم أذاك وقال :" قل هو أنا أحد
"و رد عليه لاخر: " أنا الصمد
"خلط بوهم قال: " أنا اللذي لم يلد و لم يولد
" وتلقى روحك لازم تختمها ب: " ولم يكن و لن يكون لكم كفئ أحد
شعب من أول الدنياممدود على طولو...كتبو إسم بلادو في الجرائد العالمية و حكاو بيه شوية بلدان أجنبية في عوض يتلم و يثابر ويبدا حكاية جديدة ...لا للأسف زاد تمد
باش تسلكها في وسط شعبي لازمك كيف تتكلم ترضي الناس الكل...كي تكتب تقري الناس الكل...و كي تغني تشطح الناس الكل...كي تعبر تعجب الناس الكل...باش تسلكها لازمك تعيش للناس الكل وما تكون حتى شي و ما تتميز بشيء وما تبادر بشيء... باختصارما لازمكش تكون جملا....لازمك ماتكون حتى حد
أنا واحد كيف برشة شاءت الصدف وجيت ننتمي لها الشعب...أنا واحد مالشعب...أنا تاعب كيف ما برشة تاعبين في وسط هالشعب...فادد مفغم نعاني من عوج و هرج هالشعب... أما مشكلتي و في نفس الوقت مفخرتي كيفما هي مفخرة برشة إني نحبو هالشعب...مشكلتي نغير عليه هالشعب ...مقهور عليه هالشعب ... نخمم فيه هالشعب...غايضني حالو غايضني مستقبلو هالشعب... حاول تجس نبضو هالشعب حاول تتمعن فيه و تشوف ماه وين يصب تو تحس بالخطر...تو ما تلقى ما تجس تو تلقاه شعب إنتفض لكنو سرعان ما جمد...نحبو و نكرهو فرد وقت و نحسد اللي ما همو شيء و حط راسو عالمخدة و جاه النوم و رقد
كلمة و قلتها إفهموها تعرعيرة ,إفهموها ركاكة, تكركيرة, راي,تدوينة, إفهموها كيفما باش تفهموها...كلمة و قلتها اللي باش تبردلو على قلبو نفرحلو و مرحبا واللي يحب يفد و باش يكرز ريح السد...ونعاودهالو
شعب يسخف...شعب يبكي...شعب لا فلح يفسد لا فلح يتحي و يزكي
شعب مريض...شعب عقد...شعب من أول الدنيا لا قام لا قعد
شعب يهوى يعاكس و يهوى يجي ضد...تسألو علاش و لواش ما يلقى ما يرد
25.7.11

أنا قيَدت,وإنتي وقتاش


أنا مشيت ليوم قيَدت وانتي فاش تستنَا؟
قيَدت اسمي ,قيَدت حضوري,قيَدت وجودي و عربنت على صوتي...وانتي ماتحبش صوتك يتسمع؟
علاه ماكش تونسي و ماعندكش باااااااي في اللي صاير و اللي باش يصير في البلاد؟
ماتقيَدش علاه؟ على خاتر بلاش و ماهوش بالغصب و المغضوب علينا؟ علاه؟ على خاتر هذا مش تقييد أحوال أما تقييد من نوع آخر خاص
بالمخلوقات الفضائية و جماعة الماسونية؟
أنا قيَدت و كيف قيَدت موش معناها باش ننتخب أما معناها مانيش باش ناكل صوابعي كيف يعجبني مشروع حزب معيَن و نتبنى أفكارو و إيديولوجيا متاعو و نلقى روحي نحب ننتخبو... أنا قيَدت,كمواطن,كطالب,كمدوَن,كتونسي,و كفكرون قيَدت...و الله خير كان الفكرون يقَد وانتي ماتقيدش و على الدنيا السلام....
ما تخممش ياسر و ماتعقدهاش و ما تطلعش الماء للصعدة...فز تقعد قوم و برَا قيَد بلادك مستحقة صوتك...بلادك مستحقة لصوتك...ماتخليش البنفسجي يعاود يلوَن سماها...جاست صغيرة و قيمتها كبيرة: مع كل واحد يقيَد ثمَة تجمعي يغرَد...و فرات أكثر من هكة ما عندي ما نزيدك...و أخيرا نعودهالك: أنا قيَدت,وإنتي وقتاش؟