ما فهمو كان هوّ

سنكوح:- إي إي مشيتلها

سنكوحة:- بلاّهي شنحوال البلاد؟

سنكوح:- والله لاباس

سنكوحة:- أيّا باهي...إمّالا شفمّة جديد؟

سنكوح:- فمّة كان الخير و البركة...والبركة بالراء مفتوحة يا سنكوحتي

سنكوحة:- تي هات و يزّي بلا تقشّف و لهوثة لسان..ونتي تحكيو كانك باش توهمنا إنّك تعرف تحكي

2- يا سيدي والحمدلله ،ماللي طلّ و الخير دزّ...ماللي نزِل و احنا في العزّ...آش باش نحكيلك واش باش نصورللك دافنشي وينيّك "تو سول"...كان تجي تعمل طلّة تو ماعادش تروّح... يا سنكوحتي...مالمطار... إنتي تحط ساق تغرق لُخْرا..بالطبيعة تغرق في كلّ ماهو خيّر،خِيرْ أو خيْر و بالطبيعة خير للبلاد ومش حاجة أخرى...

1-تتزعبن و تخرّج في البنّ متاعك...للبلاد و مش حاجة اُخْرااااااااااااا.... يا خراااااااااااا...ياخي البلاد حاجة وانا وانتي حاجة أخرى...البلاد راهي قبل كلّ شي شعب, بش منقولش مواطنين آش نكره دين أمّ هاك الكلمة...واللي يطلّع ولاّ يطيّح البلاد كان الشعب...كان الشعب سعى و قدّم خير, ما يلقى كان الخير والعكس صواب يا سنكوحة...

2-نعرف يا سنكوحتي وراس الفلّب و نور البلَلَوْ متاعك فاهمك...نعاود نقللّك رانا سافا الحمدلله وألف حمدلله و مستورة بالزرابي فهمتني...انا مفتخر و فخور إللي أحنا ننعمو و عايشين تحت ظلّ رحمتو، سبيك راهو السيّد عندو ما يقول في خصوص علاقتو مع المولى..و مع رعيّتو..و غنمو..

2-هههههههه، توّة باش تبدا تتضومر أه؟

1-لا والله سيريوزمن نحكي...الخبز راهو كي زاد فيه ماهوش يتجعبب عالزواولة...حاشاه يا محلاه و يا ما بنّو كان يطيح تحت زروسي...أذاكة يا سيدي حفاظا على قدر كلمة ’نعمة ربّي’...اهوكة ب250 باش أنا و هو و إنتي تعرف قيمة الخبزة و تعطيها قدرها و تقدّر الخبّاز واللّي مشوشطين في وسط الكوش في مثل هذا الوقت باش يحظروهاللك...قللّك يا سيدي أذيكا كان سببها زيارة فجئية لبوحربوب في ليلية التحوّل البوكيموني...ياخي و ربّك حبّ أكّاكة و رمى الحكّاكة, يلقي خبز بايت ملوّح في حاوية الفضلات اللّي قدّام السجن...

2-إييييييه ياخي...

1- خمم و فهم إللي كان تتواصل عملية إهدار الخبز البايت في كافة مناطق البلاد فسوف تحدث كارثة و سخط جرّاء غضب إلاهيّ من نوع صواعق وزلازل بين الحين والحين ًو هذا ما يترتب عليه ضرر بالوضع الإقتصادي...و إذا حصلت قعرة في المخطط الإقتصادي فإنكم باش تولّيو ماعادش تدزّو سدوراتكم كيما مستانسين بالفارغ قدّام التوريست إثر نشرات الأخبار...الشيء اللي باش يدفع بالبلدان الأخرى باش تقلل من شأن البلاد و تحتقرها و تحتقر سكانها و ماعادش تخمم باش تستثمر فيها...وبغضّ النظر عالمشاكل النفسية اللي باش تتسبب فيها ظاهرة إهدار الخبز البايت... وقتها موش تقلّ المعاملات الخارجية؟

2-إيييييه زيدني ونوّرني علمًا يا سنكوحة أما وطّي من صوتك شويّة و عاود أطلبني بعد ما تحل بروكسي... السكايب متاعي ولاّ مراقب مللّي جاني الكابو متاع الداخلية و فرحت بيه ...أيّا هاني نستنّا...

"يحل خونا سنكوحه الهوت سبوط و يعاود يطلب سنكوحتو... "

1-وين وصلنااااا؟

2-تقل المعاملات الخارجية...

1-إي...و كي تقل المعاملات الخارجية تزيد الّوضاع تتدهور أكثر و تولي فرانسا تسحب رهاناتها على بلادنا و الأف.أم.إي تطالب بفلوسها و ستاد رادس, والاّمريكان تحب فلوسها واليونسكو تحب على كيرانها و الطلبة اللي صرفت عليهم...هكّة ولاّ لا؟

2- صحيح...يا سنكوحي...دو يو نووْ؟ كل ما نحكي معاك نزيد نحبّك أكثر...نعرسو برك...بقدرة ربّي ال .أ.د.ن متاعك ما يصنع كان قمبلة نسميوه شوقي...أكاكة يولي إسمو بالكامل شوقي فارة...يا ربّ...إي كمّل, مازال عندي كان ربيّع ساعة و أوّل كليون يوصل...

1-عادا قتللك كي الجميعة الكلّ تطلب فلوسها...تتصور البلاد عندها ما تسدد؟ آنا نقول الضَبَبْ...حاصيلو مالإخّر مالإخّر سيدنا و معبودنا كي خممّ يلقى الكرسي في اللعبة...والشي بدا يمسلو فللي ما بين الجعبة

2-إي ياخي..

1-ياخي خزر في قرارة نفسو لتمثال الحريّة بسكرة و قال في نفسيتو:"و من لا يحب صعود الجبال يعش ابد الدهر بين الحفر"...و طلع و هبط و زاد في الخبز تطبيقا للفصل الأوّل من دستور ديمخرطيتنا."أخطى راسي وأضرب"

2-الحمدلله الحمدووووله...تف تف تف ... كان جيت بحذاك راك سمعت تزغريدي ...عين الحلسود فيها قنطرة حلق الواد...الحمدولللله وإنشالله ديما مستورة و ربّي يهديهم أعوان سجن بو حربوب ...كادو يغطسو البلاد في طنجرة تهلكة...و يا ربّي يوفق سيدنا و يلهمو باماكن أخرى لتطبيق سياسة زياراته الفجئية الحكيمة...الحمدلله الحمدلله الحمدلله..يا ربّي نشالله كيما ودّيتنا تود سويسرا والنورفيج بوحيّد ماك غايفر كيما سيدنا.

سنكوح:

الحمدلله...تصوّر كان ما صارتش الزيادة في الخبز؟

والله رانا توّة أكثر من تايلاندة و الشنوة و فينيزويلا...

راهي البلاد مقلوبة راس على عقب...مظاهرات و تكسير واشتباكات بين الشعب و الأمن...و موتى...والجزيرة تصوّر...و صحفيين في الحبس...و نقابيين في رحم الشمس...و عايلات مشتتة...و نسا هايمة في الشوارع ليل مع نهار...و ليبيّة يخدمو فيهم مقدرين ظروف البلاد...و صغار تتولد ماغير نسب و لا هوية...و يروج الدرغ والزطلا...عباد تفصع مالواقع ماتحبش تواجهو...يقرنو ريوسهم مع الدبّوزة والجعيبقات...واش لزّ حمّة يغنّي قللّو خبز و ماء و دقيق و مازوط و عظم و حليب و طماطم و ثوم و تساكر الكار...ماهو البيرة بخير ....لا قعد...تونس بخير...الشعب لاباس...مامسي داخل في حيط...خير مالبلاش...و الدخول في حيط موش كيف مالخروج منّو...و كان ماتتدخلش و تخرج في الحلّة ما تتقدمش...وإذا ما تقدمتش ماتوخرش...ما توخرش يتلهاو بيك الملوطين...حاصيلو مالبعوص نعمة من عند ربّي هالزيادة في الخبر يا سنكوحتي..كان ما وقعتش الزيادة راهو صار نقص واحنا موش ناقصين ويزيدو يكملو على ما بينا..واللي بينا لينا و منّو فينا..وانتي شفيك ما إنقصو؟ لازمنا نزيدوك و نعملو على ذلك وانتي أرقد واطمان و لا علابالك...أشرب زطّل فشّ غليلك حتّى في الدجاج كي ماخلطتش عالبقري..إنت ديما لاباس من قهوة لقهوة تقرا في لابراس...يا مثقف...يا شباب اقرا و تبنن الخبز منفّخ كي يوجهوك لحنك الباب..مكتوب عليه السنة الدولية قطاطس و كلاب...قطاطس و كلاب و غدوة أحباب مشتقة من حبّ...حبّ المرا للراجل مايوفاش ويدوم إن حافظ على سناسة المرواح بأربعة خبزات...خبز شعير..خبز ملاوي...خبز طابونة...خبز مفوّر و سوم مدوّر...خبز كيف الشعب مبسّس...بنين و يسهل هضمو و ما يقلقش عملية الهضم...الزوز يتاكلو بنهم إزّوز يكبرو في الترم...

سنكوحة:

هاااااي هاااااااااااي تي شبيك يا سنكوحة...ياخي خجّيت...فاش تحكي ياخي...سنوّة هالشعر اللي تسرصط فيه...إنتي اللى وجّهتو ولاّ وحدو شد ثنيّتو...أيّا برّة في الأمان...الكليون يدق..

سنكوح:

-اوكي...الواقي يا سنكوحة ما تنساش...راهو حتى هذا يشجع بيه سيدنا...ما تنساش..آش مازال هوّة عويمين ويبقى كان حديث..

1-أيّا باسلامة و ماغير ما نسئلك على امور الكوشة..

2-تهنّى أرقد و قوم تلقى المبسس مخدوم..كي نستحق حاجة نقللك أي بالسلامة.

يسكّر سنكوح الهوط سبوط...يكمّل ينفّخ الشوية خبز اللي بقالو في الماء...يللكلكها و يدخل عالفايسبوك...