حيرة

إحتراق أوٌل

إحتراق ثاني

و إحتراق ثالث

فحيرة...؛

ما عسانا نرسم؟

نقطة تعجٌب

نقطة إستفهام

أم ثلاث نقاط؟

من باب لقلق نحكي

من باب لقلق اللي في اغلبية الاوقات يبدا مكشخ فراديه و يستنا في زائر يسأل على حوالو وحوال دين والديه مش من باب ادعاء العلم و المعرفة و الاستحواذ على الحقيقة في زمان كثر فيه الحديث عالجهل و الخوض فيه و كثر فيه العرك لغاية العرك والسبان لغاية السبان و تفيه لغاية التفيه...م

من باب لقلق نحكي عالمثقف اللي قاري زوز كتب ويبدى في شعر راسو ينتٌف...قالك اشبيه؟ قاللك ماعادش يستحمل يعيش في مجتمع جاهل متخلف غارق في شهواتو و بحبل ميزيريا فكرية مكتٌف...مثقف زوز كتب حس روحو نابغة مغلٌف سبحان اللي حرٌم فيك القرط سبحان اللي حرمك مالنخٌالة و قال طالب علم و نافح ورقد على وذنيه و تلٌف...م

من باب لقلق نحكي عالمزيٌن روحو بكلمتين فرانسيس و حارة إنقليز و صدق روحو ماركيز وقال آنا واللي يتبعني والبقية ليهم بعرور المعيز ويستشهد بفلتان و يتسلف سطر من كتاب فلتان باش يزين بيهم حديثو و يقنع روحو اللي الناس تشوف فيه فنٌان و موش حاب يفهم إنو لعباد اللي يقدس فيهم كره ولا حب يقعدو مجرد عباد كيفهم كيف الناس الكل والفرق يكمن في كونهم تجرأو و كتبو أفكارهم و هو حكم على روحو لفكرهم باش يقعد طحٌان...م

من باب لقلق نحكي عالمغروم بتربية و نظام و تحضر الغرب و نهار كامل يمجد و يمدح و يسبح و يقدسلهم وما تبعهم كان في حاجات من حاجات...في خبطانها للعنكوش و اقناع نفسو بالغصب اللي البيرة و الشيخة و بدن الجنس المقابل دليل التحضر ...م

يشتم في المجتمع اللي ربٌاه و ويتمتع بتشليك خوه المواطن كل ما سمحتلو الفرصة و مايحاسبش روحو و ماعمرو ما حاول يفهم شبيه عمرو ما قدر واحترم "فو روج" كانشي كان صدفت و يلقى روحو صدافات مع توريست اهوكا يحشم و يلعبها ابنهم و كيفهم ويستنى الضو لخضر باش يشق الكياسات...اكالنوعية متاع لعباد اللي ما سإلش روحو علاش يحشم بتطييش اللي هوٌ في حاوية نفايات و علاش يصندر عالارض وقتاللي الصندرية مادة وجهها بردانة فوق الطاولة قدامو...م

وعلاش ما يخلصش في الكار وقتالي عندو فلوس وعلاش ما يقراش كتاب كي ياخذ بلاصة في التران ولا المترو و علاش ماخذا مالغرب كان القشور و ما تلهى كان بالقشور...من باب لقلق نحكي عالمش فاهم رومو شيحب واش مايحبش عالمش فارز بين اش يحب يشوف في روحو واش يحب يشوف في العباد...م

من باب لقلق و مش من باب معرفة نحكي عللي يتبع من غير اقتناع اللي بفيلم يتشرى و بغناية يتباع اللي عاملها في سروالو ويقول شبي الكرسي سخن اللي يضحك عالبحارة و هو عايش على كسكروت هريسة وتن...اللي يغمز في صاحبو و هو عينو عورة... واللي يدافع على حرية التعبيرو يقول من فضلكم اعطيونا السكات...م

نحكي من باب لقلق اللي في اغلبية الاوقات يبدا مكشخ فراديه و يستنا في زائر يسأل على حوالو وحوال دين والديه مش من باب ادعاء العلم و المعرفة و الاستحواذ على الحقيقة في زمان كثر فيه الحديث عالجهل و الخوض فيه و كثر فيه العرك لغاية العرك والسبان لغاية السبان و تفيه لغاية التفيه...م

في بلادي

في بلادي شعب يتخبط في الشعارات يرقد و يقوم بالسبٌاط, يتكربس مع إيديولوجيات فمٌاشي ما يولٌي متقدم و ترضى عليه بلدان اللاورو والدولارات... شعب عشق في الديمقراطية الهجٌالة, عشق في لوكها , في تذبيلة عينيها, متكلم عليها من عام ستٌة وخمسين و كل ما يقلها: "وقيت عرس"

تقلٌو : "مازالت ماكش مؤهل, فبلدك غير أمين و فكرك ليس بقويم فثر على خالقك الذي ردٌك أسفل السافلين..."

في بلادي يقتل الأخ أخاه باسم أو في سبيل حرية التعبير... ينعتو بالجهل والبهامة والتخلف, لا لغاية غير بش يقنع روحو انو كبير و بكلو تفتح و حضارة و خصبة تفكير... وفي بلادي وافق ولاَ نافق ولاَ التزم بالسكات...

العب ولا حرَم ولاَ قول ملاَ مستويات...

اشرب ولاَ طير قرنك ولا شعل في روحك النار... و ناس بش تقول شهيد, و ناس بش تقول مناضل, و ناس بش تقول لا يرحم من مات...وفي بلادي شعب يستغل مثل هذه المناسبات...

في بلادي حزب معارض وحزب متعرضلو في المنعطف...هذا يسب ولاخر يشتم, هذا يتحي ولاخر يزكَي, و في الاخر تركح البونية والكف... وبالكشي يمشي في بالك انو سبب الخنافر انو كل منهم قاعد يدافع على مشروع اصلاحي...

قداكش نيَة يا راجل... وراسك ماالقلق و برَة , على قد ماك باش تتفرج في رواندهم على قد ماك باش تشوف بيادق تموت و ماعمرك باش تسمع ب "كش مات"... وفي بلادي فرق مكبوتات تقتل و تسفك و تسفَح في سبيل ايديولوجيات...

في بلادي شعب مرهق...شعب يئن و لا ينطق...شعب دامي الخطى يصرخ ولا يسمع له صدى, شعب يحتضر ولا يرجو دواء...شعب يخجل من لام التعريف...وفي خجله من لام التعريف حياء..

فمالغاية في اثقال كاهل شعب بالف ولام اذا لم يعرف هويته و وجهته ومبتغاه...فمالغاية في اثقال كاهل شعبي بالف ولام, و شعبي مرهق يحتضر تفصله بضع الانفاس عن الإنعدام...

و في بلادي شعب مرهق...شعب يئن و لا ينطق...شعب دامي الخطى يصرخ ولا يسمع له صدى, شعب يحتضر ولا يرجو دواء...شعب يخجل من لام التعريف...وفي خجله من لام التعريف حياء..