5.4.10

في هاك التركينة ملوّحْ




في هاك التركينة ملوّحْ...

يبكي بالصوت و ينوّحْ...

في هاك الظلمة تعبت عينيه..كلِيكْ ناموس مِتحامي فيه...

و النمّال ياكلُّو في صوابع ساقيه..ضرب راسو عالحيط للمرّة ...

ثنين وعِشْرين...


طلّ عليه خونا وِركح يمسّد عليه...

هذا يمسّد و خونا يصيح...


خونا ماخو اُستاذية...واللي يمسّد "لابراس"تُصعب عليه...

خونا حبّ يفهّم لعباد شْمعناها ديمقراطية...و الديمقراطية غدْرِتْ بيه...

حب يحكيلهم عالحقوق والحريّات...ياخي بين ليلة و نهارشمعة حياتو طفاتْ...

حبّ يفيّقهُم بالواقع واللي قاعِدْ ياقعْ,مِسكين...للمتْراك يلقى روحو راكعْ...

حبّ يرفع وِيْندِّدْ بشعار الحريّة...كسْرُولو ضَلْعِين والباقي هاوم في الثنيّة...

خونا حبْ يمارِسْ حُرية التعبيرْ...خونا عقد النوّارة في لوغة التغييرْ..حس بروحو عمل جوانحْ و باش يطيرْ...ما فاق من حلمتو كان و هوّ يتكرْكِرْ تكركيرْ...


ثنينة و عشرين سنا...و ياما حْلِمْ بروحو للدارْ مروَّحْ...و يْفيق و يلقى روحو...

في هاك التركينة ملوّحْ...

يبكي بالصوت وِينوَّحْ...

1 commentaires:

Anonyme a dit…

سايس روحك يا عشيري راك تنجّم تصبح ملوّح في تركينة حتى إنتي...