من باب لقلق نحكي

من باب لقلق اللي في اغلبية الاوقات يبدا مكشخ فراديه و يستنا في زائر يسأل على حوالو وحوال دين والديه مش من باب ادعاء العلم و المعرفة و الاستحواذ على الحقيقة في زمان كثر فيه الحديث عالجهل و الخوض فيه و كثر فيه العرك لغاية العرك والسبان لغاية السبان و تفيه لغاية التفيه...م

من باب لقلق نحكي عالمثقف اللي قاري زوز كتب ويبدى في شعر راسو ينتٌف...قالك اشبيه؟ قاللك ماعادش يستحمل يعيش في مجتمع جاهل متخلف غارق في شهواتو و بحبل ميزيريا فكرية مكتٌف...مثقف زوز كتب حس روحو نابغة مغلٌف سبحان اللي حرٌم فيك القرط سبحان اللي حرمك مالنخٌالة و قال طالب علم و نافح ورقد على وذنيه و تلٌف...م

من باب لقلق نحكي عالمزيٌن روحو بكلمتين فرانسيس و حارة إنقليز و صدق روحو ماركيز وقال آنا واللي يتبعني والبقية ليهم بعرور المعيز ويستشهد بفلتان و يتسلف سطر من كتاب فلتان باش يزين بيهم حديثو و يقنع روحو اللي الناس تشوف فيه فنٌان و موش حاب يفهم إنو لعباد اللي يقدس فيهم كره ولا حب يقعدو مجرد عباد كيفهم كيف الناس الكل والفرق يكمن في كونهم تجرأو و كتبو أفكارهم و هو حكم على روحو لفكرهم باش يقعد طحٌان...م

من باب لقلق نحكي عالمغروم بتربية و نظام و تحضر الغرب و نهار كامل يمجد و يمدح و يسبح و يقدسلهم وما تبعهم كان في حاجات من حاجات...في خبطانها للعنكوش و اقناع نفسو بالغصب اللي البيرة و الشيخة و بدن الجنس المقابل دليل التحضر ...م

يشتم في المجتمع اللي ربٌاه و ويتمتع بتشليك خوه المواطن كل ما سمحتلو الفرصة و مايحاسبش روحو و ماعمرو ما حاول يفهم شبيه عمرو ما قدر واحترم "فو روج" كانشي كان صدفت و يلقى روحو صدافات مع توريست اهوكا يحشم و يلعبها ابنهم و كيفهم ويستنى الضو لخضر باش يشق الكياسات...اكالنوعية متاع لعباد اللي ما سإلش روحو علاش يحشم بتطييش اللي هوٌ في حاوية نفايات و علاش يصندر عالارض وقتاللي الصندرية مادة وجهها بردانة فوق الطاولة قدامو...م

وعلاش ما يخلصش في الكار وقتالي عندو فلوس وعلاش ما يقراش كتاب كي ياخذ بلاصة في التران ولا المترو و علاش ماخذا مالغرب كان القشور و ما تلهى كان بالقشور...من باب لقلق نحكي عالمش فاهم رومو شيحب واش مايحبش عالمش فارز بين اش يحب يشوف في روحو واش يحب يشوف في العباد...م

من باب لقلق و مش من باب معرفة نحكي عللي يتبع من غير اقتناع اللي بفيلم يتشرى و بغناية يتباع اللي عاملها في سروالو ويقول شبي الكرسي سخن اللي يضحك عالبحارة و هو عايش على كسكروت هريسة وتن...اللي يغمز في صاحبو و هو عينو عورة... واللي يدافع على حرية التعبيرو يقول من فضلكم اعطيونا السكات...م

نحكي من باب لقلق اللي في اغلبية الاوقات يبدا مكشخ فراديه و يستنا في زائر يسأل على حوالو وحوال دين والديه مش من باب ادعاء العلم و المعرفة و الاستحواذ على الحقيقة في زمان كثر فيه الحديث عالجهل و الخوض فيه و كثر فيه العرك لغاية العرك والسبان لغاية السبان و تفيه لغاية التفيه...م